|
« HAITI KE VIV’»
Kouté istwa on bel’ péyi
Ki lévé adan on sèl’ kri
Libèté pou Haïti chéri
Ki avè Toussaint Louverture
Ki avè Jean-Jacques Dessaline
Yo té gannyé la gras’ divinn’
Pou viv’ on bèl’ avantur’
Yo repousé anvayisè
Ki vinn’ èvè tout’solda ayo
Mé rèv’ ayo touné an pousyè
Alo yo tonbé an dalo
Jodi la tè ka tranblé
E tout’ moun’ ka kriyé “anmwé”
Mé papa bondyé pé pa ayen
Cé lanati ki mèt’ a desten
A la mizè yo ja vwè
A la soufè yo ja soufè
Yo paka mété jounou atè
Kouté istwa on ti péyi
Kè malè paka fè fèbli
Non ay’ sé Haïti chéri
Cé prémyé répiblik’ a nèg’
Fo on jou yo pé sa montré
Apa paskè tout’ moun’ avèg’
Ké yo péké rivé lévé
Leklézyast’ di : « yonn’ rédé lot’ »
Fo pa rété débwa balan
Sépa yenki bilten de vot’
Ké fè vi ayo pwen douvan
Tousa mizè yo ja vwè
Tousa soufè yo ja soufè
Yo péké mété jounou atè
PIERRE-VICTOR Claude
|
