|
Cours
1ère Partie
Mi péyi-la
i la
an plen mitan lanmè
an plen mitan solèy
Mi Marigalant
Mi Lésent
Donminik anba
é on kyolé tifrè
é on kyolé tisè
Antig
Barbad
Trinidad
Kiba
Ayiti
Sendomeng
Portoriko
Péyi a karayib
Péyi a nèg
Péyi a zendyen
Péyi a blan
Péyi a milat
Nou byen foutépanmal
Mi péyi-la
i la
an mitan dlo
kon bato
an plen lanmè karayib
VIV PEYI-LA !
E mi zanfan péyi-la
Mi yo
Mi yo doubout an péyi-la
An plen mitan lanmè
An plen mitan solèy
yo la
po nwè
po jòn
po wouj
po chapé
po blan
Nou byen foutépanmal
Nou sav sé zanfan péyi-la
Pas
Sé swè a-yo ki ka wozé péyi-la
Pas
Sé san a-yo
Sé san a papa-yo
ki ka koulé
an péyi-la
Pas yo vlé viv
an péyi-la
Yo ka kriyé
VIV PEYI-LA !
VIV ZANFAN PEYI-LA !
Mé
Mi lènmi zanfan péyi-la
Mi-y
Gadé-y sizé an péyi-la
I blan
i jòn
i nwè
i po chapé
Nou byen foutépanmal
Nous av sé lènmi zanfan péyi-la
Pas
I ka viv si péyi-la
Evè swè
Evè san zanfan péyi-la
I ka maré péyi-la
I ka sengné péyi-la
kon sansi !
Mi lènmi zanfan péyi-la !
Mé vou ki la
frè an-mwen
vou ki ka gadé
ou pa ka vwè ?
vou ki ka kouté
ou pa ka tann ?
Rété kouté
kouté pou tann
tann é konpwann
ka ki péyi-la ?
ka ki zanfan péyi-la ?
ka lènmi zanfan péyi-la ?
E si ou konpwann
ou sé on zanfan péyi-la
E menmsi ou sé anni
on zanmi zanfan péyi-la
Doubout !
Dwèt kon pikyèt !
Maré ren a-w
pou nou sa démaré péyi-la
é konmansé kriyé èvè-nou
VIV PEYI-LA !
VIV ZANFAN PEYI-LA !
|
